Offisiell karakterstatistikk

Samordna opptak skal bruke offisiell karakterstatistikk frå utanlandske utdanningsmyndigheiter så langt det er mogleg. Andre autoritative kjelder kan nyttast der det blir vurdert tenleg.

Eigeninnsamla karakterstatistikk

Der offisiell statistikk ikkje er tilgjengeleg, skal det samlast inn statistikk frå søkjarane i det samordna opptaket, eller ved hjelp av samarbeidspartnerar i andre land. Dette føreset at det er eit tilstrekkeleg tilfang av vitnemål/resultat å byggje statistikken på.

Lineær omrekning

For utdanningssystem der Samordna opptak ikkje har statistikk som kan brukast, får søkjarane ei lineær omrekning av karakterane sine. Dette betyr å rekne om karakterar til norsk skala utan å ta høgde for skilnader i karakterfordelinga mellom det utanlandske utdanningssystemet og det norske. Lineær omrekning skal berre brukast dersom det er grunnlag for å anta at karakterfordelinga i det utanlandske utdanningssystemet ikkje har store avvik frå karakterfordelinga i norsk vidaregåande opplæring.

Ei lineær omrekning skjer etter følgjande formel: $$Y = 2 + \lvert\frac{4 \cdot \lgroup A - C \rgroup}{ \lgroup B - C \rgroup}\rvert$$ I formelen er Y den norske gjennomsnittskarakteren, A er den utanlandske gjennomsnittskarakteren, B er den høgaste karakteren i den utanlandske karakterskalaen og C er den lågaste ståkarakteren i den utanlandske karakterskalaen. Verdien av $$ \lvert\frac{4 \cdot \lgroup A - C \rgroup}{ \lgroup B - C \rgroup}\rvert$$ er alltid eit positivt tal.

Karakterar frå land/utdanningssystem/karakterskalaer som ikkje står i oppført i lista under, blir rekna om lineært ved hjelp av formelen over.

Individuell vurdering

For utdanningssystem Samordna opptak ikkje har statistikk frå, og som ein reknar for å ha vesentlege avvik i karakterfordelinga frå norsk karakterfordeling, skal søknadar rangerast etter § 7-12.